8

كوادر ما بعد – الحداثة

الف تحية لصوبات الفن الأمنية .. وسلام تعظيم .. ميت كلية .. فى مدارس الكادر الشرعية .. منذ التأميم انتاج ياما .. نقاد روايات شعر دراما .. اخدوا التطعيم ضد الأفكار .. فى يمين فى وسط فى لبط فى يسار الفكر رجيم وبقوا كوادر .. جيش المأمور عبد اامر .. يلسنوا بالسيم .. مليون دكتور .. فته وفليتوا يلتوا طابور .. خطوة بتنظيم .. يا جراد مطلوق .. سلم للسوق الرايج فوق .. باعوا بملاليم وغزوا الندوات .. شعر وسينما وسياسة وجات .. تموين .. تعليم .. باعو أبوها .. وبفكر الغفرا خربوها .. فى يسار ويميم .. وثقافة أيه .. تخرج من أيد العبد البيه .. جحش البرسيم

خبراء
حب كريز فوق تورته صناعى
طعم ولون الكدب جماعى
ساعة الهبر الكل يزيحة
واتلهى فيه .. أنا سهل خداعى
فى السيرك
شاعر فى كستبان
جنى فى كل أنس
قلع القناع فبان
أراجوز ونسوان وجنس

أضعف الأيمان
تبت فى شعرة معاوية العب على الحبلين
هذا زمان البلاستيك والكلام الجاف
وما دمت خرمان مفستك أو رغيف حاف
دارى الحقيقة اللى غاوية تبان على وشين
وكون جبان مط استك .. والسع الخواف

وأضعف منه
يا قليل الحيل وطيب .. هات الكتاب تنقرأ
حكم الزمان قريب .. ع الندل وابن المرة
يا دوب تقدر تعيب .. وترشهم بالخرا
بس أوعى تانى تخيب .. تضعف .. تبص لورا

فزورة

شارع باع امبارح لليوم
وقال يا بكره نسينا الدم
قال جعت يا ما قلت أصوم
فعشت أفطر هم وغم
سالته طب على أيه مهموم
قام قال لى أصل الشعر أهم
طب ليه أكلت العيش مسموم
قال حين نكرنى الخال والعم
وأنا ملتزم بالناس متهوم
طول عمرى بالأوطان مهتم
عشان كده راح أورى القوم
مين اللى فرط الأصل ولم
و ح يشهدوا ان المعلوم
كان حق عرقى ومش متهم
انا اللى قلت بكيفى أعوم
مع الأهم أكون أهم