براغيث
سارحة براغيث أباظة فى جناين الأدب
تمص ريق الود ييبس حطب
مأزومة تكره هديل المبدعين الحى
ولو ان دود مشنا من نسل سوس الخشب
لصوص
دناوة النفس تكره عزة الأشعار
لذا لا تلاقى الندالة تليق عليك يا حمار
حلمك صغير قوى على قد موهبتك
دى جنتك عفنت من سرقة الأفكار
تحولات
أنا باعشقك ثوانى وباكرهك ساعات
روح شوف لك حد تانى يحيى العمر اللى فات
كان فيه زمان أهل وللهوى حكايات
كان حبنا الهبل غنيوة للبنات
كنا لها الأغانى واللححن .. للكلام
نشف شجر الأمانى كسف قمر الغرام
وصبحنا يا حبيبى عاهات زمن عويل
حقى ارضى بنصيبى من الماضى النبيل
الصيف حرمنى لونك تاه صوتك فى الخريف
النور زغلل عيونك مع انك ولد ريف
وعشان ضاع الربيع طالت بنا المسافة
وأما العشاق تبيع صفو الغرام خرافة
الخماسين
مارس عدى بسرعة .. ما هدى
أنا قلت له فينك من مده ؟
لا عديت .. ولا هديت .. ولا لونت خد الوردة
قال أنا خايف من أمشير .. عودى ضعيف قوى على التكسير
والعصافير لسه جناحتها خضرا وعاجزة ترف تطير
قلت أبريل جاى بزفة .. كدابة وراكبة على الدفة
جرى فى غيطانة .. هبل أغصانة
والريح طاح بجنونة استكفى
ادى ربيعنا اللى مسربعنا
شتتنا وعمره ما جمعنا
نسمته من لمسته تتعفرت وكأنها بمقاس مواجعنا
