10

عنوان بيتنا زى ما كان
كان زمان تيجى وتزورنى
النهارده ليه مفيش ؟
كان يومينا نشيد ومغنى
وليالى ما تنتهيش
فن ضحك هزار موسيقى
لعب طاولة شيش وبيش
شعر مسرح أو سياسة
مش غشم ولا أكل عيش
لما كنا نحب نعشق
واما نغضب ما نعاديش
واللى يزعل منا يرحل
من سكات ما يفتريش
الوجوة كانت صريحة
اقنعة ما ح تلاقيش
الصداقة مش مجاملة
بالمعاملة الشوق يعيش
اللى فى قلوبنا نقوله
واما نسكت ما نداريش
عمره ما اتبسم فى وشى
اللى كان ما يحبنيش
ولا كنت ارض اسلم
ع اللى خاف ولا يختشيش
كنتو لا بيمنعكو سلم
عالى ولا خوف من شاويش
ايه جرى لكم وايه جرى لى ؟
لسه جبنتنا قريش
ولذا انا مش ح ازورك
ياللى عدت ما بتجنيش
30 شارع الجزيرة
هوه هوه زهور وخيش
لو باقى له مكان فى قلبك
كان تزوره ما تنسانيش
الوداد يحتاج محبة
زى رمضان والياميش

عزوتك م الجهله .. أريح يلخموا الناس بالهيافة
هز وسط الدولة أريح , من وجع راس الثقافة